بالوقت يلي النساء بالعالم العربي عم تواجه مشاكل من هالنوع. بالوقت يلي أشخاص متل إسراء غريب وزوجة الإعلامي الشهير وغيرهم كتير، بيتعنفوا وبيفقدوا حياتهم بسبب غياب القانون والدعم يلي بيقدر يحميهم. بالوقت يلي غروبات البنات هلأ كلها بوستات شماتة باللي صار مع دانا جبر، من دون أدنى احترام لحريتها وخصوصيتها.
بتلاقي “النسويات” العربيات والمتصدرات نظرياً للدفاع عن حقوق المرأة مشغولين بلفت الأنظار حول المساواة، وحق المرأة بعدم المشاركة بأعمال المنزل، وحقها بركوب البسكليت وغيره..
هل هي الأمور مالها مهمة؟ مبلا، مهمة أكيد.
هل هالأمور أولوية ومفصلية بحياة المرأة العربية بالوقت الحالي؟ برأيي لاء.

شو تغيّر بحياة المرأة السعودية بعد ماصار مسموح قيادة السيارات للنساء؟ هل تعتبر تحررت؟ هل صارت قادرة عن أخد قرارت حياتها بحرية؟ هل اتخلصت من النظام الأبوي الذكوري يلي مسيطر عليها؟
لأنه بسلم أولويات حقوق المرأة -إذا فكرنا برسم واحد-، فالأولى نطالب بحقها بالحياة، حقها بالتعليم، حقها بالاستقلال المادي، حقها باختيار الشريك يلي رح تعيش معه، حقها بالانفصال عنه من دون ماتتدمر اجتماعياً واقتصادياً، حقها بالإنجاب أو عدمه، حقها بالمشاركة بقرارات حياتها، حقها بحياة آمنة من العنف، حقها بوجود نظام دعم قانوني بيحميها نفسياً وجسدياً واجتماعياً.

المشاكل الأساسية مع النسوية حالياً برأيي، إنها أولاً توجهت للذكور فقط من دون ماتوعي النساء نفسهم أول شي بحقوقهم وواجباتهم، فصار عنا مجتمع نسوي متناقض بيهاجم بعضه، وبده ياخد حقوقه بلا مايقدم واجباته.
وتانياً إنها اختصرت حالها بالقضايا البسيطة، واقتصرت حملاتها عالقضايا يلي بيعانوا منها إناث السوشال ميديا، -وأنا وحدة منهم-، نحنا يلي نوعاً ما أخدين الحقوق الأساسية المذكورة قبل، فمنقدر نتفزلك ونقول بدنا نطلع درجة بسلم الأولويات ونطالب بشغلات ثانوية.
فالنساء يلي بدهم هالنوع من الحقوق صدقيني قادرين هنن يطالبوا فيها ويحصلوا عليها أحياناً.
بس المرأة المضطهدة حقيقة يلي مالها حضور عالسوشال ميديا مين بيحكي بصوتها؟ مين بيطالب بحقوقها؟

متأكدة كل حدا فينا بس يفكر شوي رح يخطرله كتير نماذج لنساء مظلومات بس قضاياهم مالها كول ايناف لنحكي فيها هون.
مابقدر كتير لوم أي ذكر بيستهزء أحياناً بالنسوية، لأنه حتى أنا كبنت بوصل أوقات لهالمرحلة.
النسوية مو تمردي وبنت لابسة خلخال وعاملة تاتو. النسوية مو يعني تضربي العالم منية لأنك بنت وبتدرسي فرع علمي، كأنه كونك بنت فهي disability وأنت تغلبتي عليها.
لازم تفهمي إنه Your success is not a compliment just because you have vagina النسوية مو يعني تفرضي ع كل النساء حواليكي يتركوا حلمهم بالزواج وتكوين عيلة، وتجبريهم يشتغلوا ويعملوا كاريير.
النسوية إنك تدعميهم بحرية خياراتهم شو ماكانت وكيف ماكانت .ويعني تطلعي من التفاصيل الصغيرة وتفكري بالعموميات، بتغيير المنظومة القانونية والاجتماعية لتلائم كل النساء من حولك، مو تفصلي وحدة ع قياسك، لأنه هيك بتبطلي تفرقي عن تسلط النظام الذكوري بشي.

“The point is not for women simply to take power out of men’s hands, since that wouldn’t change anything about the world. It’s a question precisely of destroying that notion of power.“
– Simone de Beauvoir